للخوف أنواع كتير واللي بتتحول مع الوقت لإضطراب نفسي يُسمي بالرُهاب [ الخوف الشديد ] زي مثلا إضطراب الخوف من — المرتفعات Acrophobia — الزحام Agoraphobia — الأماكن المغلقة Claustrophobia وغيرها كتير من أنواع الفوبيا.
لكن انا هتكلم هنا بإختصار عن نوع مهم أوي من الفوبيا وهي فوبيا الفقد لأنها للأسف بيترتب عليها تدمير شخصيات وإستعبادهم.
فوبيا الفقد بيُصاب بيها الذكور والإناث وده بيبقي راجع لإهمال الأهل في الصِغر وده نوع من أنواع إساءات الطفولة اللي بتسبب بعد كدا مصايب وكوارث في الشخصية وبيفضل الشخص يعاني نفسيا إلي أن يتخذ القرار بالعلاج النفسي سواء إنه هو يدرس أصلا ويتشافي كدا مع نفسه وبالإستعانة بالله أولا أو أن الشخص يخضع لجلسات علاج نفسي مطولة تساعده علي التشافي أو إن الشخص ده يتعرض لإضطهاد وعنف نفسي شديد جدا فيبدأ يُدرك إنه خوفه الشديد ده كان غلط وكان لازم يغيره ويتعالج منه من الأول لكن طبعا الإدراك بيلعب دور مهم جدا في التشافي النفسي زي الإعتراف بإنه أصلا محتاج للعلاج النفسي وان يكون عنده من قوة الشخصية ومن الإرادة والعزيمة إنه فعلا يُقر بهذا الإضطراب النفسي ويسعي لعلاجه ولإصلاح ما نتج عنه من تدمير لنفسه وظلم شديد لها بجذب علاقات سامة تمحق نفسيته وكيانه لأنه مش كل الناس اللي عندهم إضطراب نفسي بيعترفوا أساساً إنهم شخصيات سامة ومصابين ومحتاجين للعلاج النفسي زي إخواتنا المصابين بإضراب الشخصية النرجسية NPD
فلكل مُصاب بإضطراب رُهاب الفقد .. اكسر الخوف اللي جواك واتمرد عليه ولازم تاخد وقفة بجد مع نفسك وتعرف أن علاجك بإيدك وصدقني لو خايف تخسر يبقي احب اقولك مش هتخسر أكتر من اللي خسرته وتأكد إن رزقك بإيد اللي خلقك مش بإيد اللي اتخلقوا معاك ولازم تكون قوي نفسياً وتختار كرامتك وحُريتك وعزة نفسك.